CHEGAR E ENCHER

BEA CAMPOS

Chegar e encher é un monólogo escénico ácido e humorístico creado e interpretado por Bea Campos. Un espectáculo de Inventi Teatro que mestura narración oral, cabaré e improvisación para reflexionar sobre as expectativas sociais, os roles de xénero e a beleza do fracaso. Cun formato íntimo e directo, convértese nunha experiencia teatral tan divertida como reveladora.

SINOPSE:

Pasen e vexan: esta muller que agora está no escenario foi unha nena encantadora, segundo dicían as veciñas e a súa mestra de primaria. Tiña todo o necesario para ter unha vida feliz, tranquila, previsible… pero a realidade deu voltas inesperadas. Chegar e encher é un monólogo no que Bea Campos explora, con humor e honestidade, as contradicións da vida adulta, a presión por cumprir coas expectativas e a imposibilidade de encaixar nun guión alleo. Entre a improvisación, a narración oral e o cabaré, o espectáculo constrúe un retrato tan persoal como colectivo sobre o que significa vivir (e fracasar) fóra do establecido.