VERBA ESTIRPE D’O’LEO DE MATAMÁ

Verba estirpe é o novo proxecto d’o’leo de matamá, unha proposta que une música, poesía galega, performance e creación audiovisual para poñer no centro a forza da palabra. O traballo nace dun proceso de dous anos e reúne 27 textos da nosa tradición poética, musicados por orde cronolóxica, desde Afonso X ata Daniel Salgado. Concibido como unha experiencia ao vivo cunha dimensión parateatral, o espectáculo coida especialmente a posta en escena visual e audiovisual para que os textos sexan os verdadeiros protagonistas. A música convértese así nun vehículo para activar a memoria poética galega e achegala ao público desde unha linguaxe contemporánea, íntima e envolvente. Verba estirpe propón unha viaxe pola palabra herdada e pola palabra viva: unha celebración da poesía como materia sonora, escénica e comunitaria.