1972

1972 é un proxecto de creación-mediación que reúne un grupo de adolescentes de Vigo e unha equipa de profesionais das artes escénicas para investigar e levar á escena un dos episodios máis significativos da loita obreira durante o franquismo: a folga xeral de setembro de 1972, que paralizou a cidade durante quince días. A partir dun proceso colectivo de aprendizaxe e creación, o grupo achégase a este acontecemento histórico desde o corpo, a voz e a escena, coa vontade de “bailar a loita” e revivir a enerxía dun feito fundamental da memoria viguesa do que apenas quedaron imaxes ou rexistros audiovisuais. O proxecto está pensado como unha experiencia educativa e artística para xente nova interesada tanto nas artes escénicas como na historia da súa cidade. A través da danza contemporánea, a sonoplastia, as texturas audiovisuais, a iluminación creativa, a dramaturxia documental e a creación colectiva, 1972 desemboca nun espectáculo final que poderá verse os días 12 e 13 de novembro na Sala Ártika, situada precisamente nunha das zonas da cidade que detivo a súa actividade durante aqueles días de loita.