4200 KM

4200KM, de Teatro de lo Inestable, é unha creación escénica poética e conmovedora que aborda a desaparición, a memoria e a crise migratoria a partir da imaxe dunha barcaza con vinte e cinco persoas á deriva no océano. A obra sitúanos mar adentro, tan lonxe da costa que xa non se ven os límites da terra. Só queda o mar, a noite, as tormentas, o frío, o horizonte e unha distancia inmensa. Nese espazo extremo, o tempo queda suspendido e cada corpo se expón á espera, ao medo e á esperanza. 4200KM narra o proceso de investigación de Nuria Albelda sobre o que aconteceu durante e despois dos 90 días que durou a viaxe dun caiuco á deriva. A través dos documentos atopados sobre unha bióloga mariña obsesionada coas baleas, dos nenos perdidos do caiuco e do diario dun tal J. Pallarés, a peza reconstrúe unha pregunta tan necesaria como incómoda: onde quedou a tripulación da barca aparecida a 4200 quilómetros dun porto amigo? Un espectáculo de grande forza visual e emocional sobre as persoas que desaparecen no seu camiño migratorio na procura dun lugar mellor. Unha obra para lembrar que detrás de cada cifra hai nomes, corpos, historias e vidas que merecen ser contadas.