NON PASARÁN

ARTIKA CÍA.

NON PASARÁN, creada por Ártika Cía e dirixida por Tito Asorey, é unha comedia crítica e contemporánea que mergulla ao espectador nun contexto distópico de medo colectivo e resistencia social. Cun elenco sólido e unha posta en escena potente, a obra convida a reflexionar sobre os límites da hospitalidade, a manipulación do discurso colectivo e o perigo da autodestrución ideolóxica.

SINOPSE:

Nun país sacudido por unha vaga de incendios provocados por unha organización descoñecida, a cidadanía adopta un lema férreo: “Non pasarán”, negándose a acoller a estraños nos seus fogares. Cándido e a súa filla Ana rompen esta regra ao recibir a unha misteriosa parella. O que comeza como un acto de xenerosidade convértese nunha sucesión de acontecementos que pon en cuestión os seus principios, revelando contradicións persoais e colectivas. A través do humor e da tensión dramática, NON PASARÁN explora como a desinformación, o medo e a moral acomodaticia poden levarnos á destrución dos nosos propios valores, até converternos —sen querelo— en cómplices daquilo que rexeitamos.