PUNCTUM

Punctum é o novo proxecto musical liderado polo guitarrista e compositor Manuel Cebrián, acompañado por Paco Charlín ao contrabaixo e David Puíme á batería. Tres músicos cunha ampla traxectoria na escena jazzística nacional e internacional que se xuntan para crear unha proposta acústica, coidada e profundamente expresiva. A música de Punctum inspírase nas grandes cuestións da existencia humana: a familia, a natureza, a vida, a morte e as complexidades de habitar o mundo contemporáneo. Cada composición convida á reflexión desde un espazo sonoro que atravesa a emoción, a escoita e a intensidade da música en directo. O trío explora as posibilidades rítmicas, texturais e tímbricas dunha formación clásica de jazz, mantendo sempre a fidelidade ao son puramente acústico. Nun formato íntimo, o público convértese en testemuña dunha creación viva, onde a interacción entre os músicos está ao servizo do momento presente. Un concerto vibrante e emocionante, pensado tanto para persoas afeccionadas ao jazz de vangarda como para quen se achega por primeira vez a este universo sonoro.